تثمين المنتجات الفلاحية كيفاش نطرح المنتوج ديالي في السوق

السلام عليكم اخواني اخواتي الفلاحين و الفلاحات مبروك علينا وعليكم أمطار الخير ….موضوع اليوم  جد جد مهم لانه أساس الفلاحة و بدونه واخا تعيا تخبط فتراب ماعمرك تجيب رباح هو موضوع عندو علاقة بسوق هو موضوع تجاري ماعندو حتى علاقة بتقنيات الزراعة بسبابو ناس ملات الفلاحة و ناس خلات لبلاد راقدة ومشات تخدم  في المدينة..و نساو بلي لي عندو الارض ماعمرو يموت بجوع…..الموضوع هو تثمين المنتجات الفلاحية يعني كيفاش نطرح المنتوج ديالي فسوق و شنوهوما مكونات السلسلة التجارية لي كايمر منها اي منتوج…

كيما كانعرفو ان الفلاحة هي العمود الفقري ديال اقتصاد البلاد و الاقتصاد كايخضع لقانون العرض والطلب لي ماكايرحمش الفلاح الصغير و المتوسط..باش تفهمو هاد لقضية ناخدو مثال ديال دجاج رومي اش ظهر ليكم فثمن ديالو طاح و ناس غرقات شيكات و كاين لي داخل لحبس بملايير صحاح…كاين لي كايقول لوبيات هوما لي شادين سوق و كاين لي كايقول ان لعلف تزاد  الى أخيره… لا ا سي محمد راه لعيب فلمربي صاحب المشروع…كانعرفو جميعا ان دجاج كايوجد على 45يوم و فيه الصرف من لمزيااان و حنا مغاربة اي حاجة فيها فلوس كانتلاحو ليها ملي كاتشوف جارك ضرب بانضة ديال دجاج خرج بيكوب ميتسيبيشي كاش و لبانضة تانية شرا فيرما يعني حتي نتا كاتبغي دير فحالو و جاركم لاخر و لاخر كدلك شوف لية المغرب شحال فيه من مربي…بهاد العملية سلعة كاتكثر فسوق و بطبيعة لحال كاينقص ثمن حيت سلعة موجودة..من هنا نفهمو سبب انخفاض الاثمنة الفلاح كايلصق فحاجة وحدة و هدا خطأ….. باش دور مع السوق كيما كايقولو لحرايفية لكبار خصك تنوع من منتوجات ديالك..ماشي بحال هداك لي كايسمع بطاطا فيها فلوس كايضرب 5هكتارات كاملة بطاطا 4 أشهر هو يصرف و كايجي مع السوق ميت..را ماشي نتا بوحدك لي دكي و نزق راه المغرب كامل عرف بطاطا فيها فلوس و ناض زرعها حتى داك طبيب والبرلماني … لي لا علاقة لهم  مع الفلاحة لي عندو 10هكتارات و 20 و 30 باغي يدور فلوسو كايجيب فلاح لي يقابل ليه بطاطا..حتى بطبيعتنا البشرية طماعين و باغين نديرو فلوس..انا غي عطيت مثال على الخضرة حيت زراعة موسمية حتى بالنسبة لجميع المنتجات الفلاحية…..قبل ماندور مع السوق خصني ندور مع راسي شوية بعدا نفكر قبل مانتلاح را السوق غدار لا زرعتي كلشي بطاطا و عرقتي عليها ربي غايجازيك على ديك تمارة لكن السوق مايخلصكش على تمارتك كون لقاو تبيع ليهم بطاطا فابور مايكرهوش…ماعلينا….

باش نبقا شاد سوق من راسو اول حاجة نتوكل على الله مانزعمش فحاجة وحدة ديما نوع مثلا ندير 3 ولا اكثر ديال لخضرة مايمكنش نخسر فيها كاملة حاجة تكالي على حاجة زرع و فنفس الوقت كاتريح فقهاوي مريح مريح جمع عليك سماسرية عطيهم شنو عندك باش يالله تجي معاها قد قد واخا غايربح معاك مرة الاولى لكن مرة ثانية غادي تبيع لشاري ديريكت لي جاب ليك سمسار حيت كاين فرق بين سمسار و بياع و شراي..سمسار كايبيع ويشري بجيبو خاوي اما لبياع وشراي بشكارتو…و رباح فلمشرى ماشي فلبيع يعني نحاول نقص علية مصاريف قدر المستطاع يعني نسول على الاعانات الموجودة را تلقا المعلومات الكافية فمركز الاستشارة الفلاحية ONCA ولا الادارة الاقليمية للفلاحة DPA لي ربحتها فابور راه مزيان..الانسان لي كايقوليك انا من نهار بديت كاندير غا بطاطا و مقمر مع سوق هههه القمر حرام اولد عمي..لا عارف غي بطاطا سول على كيفية زراعة ديال حاجة اخرى دخل الانترنيت غاتقولية ماقاريش غانقوليك سير حضر للدورات التكوينية لي كايدير المركز الاستشاري ماشي يعيطو ليك تمشي حتى لوقيتة ديال زرود تاكل و تزيد فحالك راه لي شديتيها فراس كاتبقا و لي شديتيها فلكرش كاتمشي …… عطا الله مايدار كاين شي خضر كايمشيو لبرة يعني كاينفسو شوية السوق الوطنية مثلا كورجيط كرعة قزبر نعناع و كاين شي نباتات طبية غي نص هكتار تبيعو طاير و تربح فيه هادشي راه كيكونو عليه دورات تكوينية و كايحكروه الفلاحين…ديما ماتبيعش بيعة الزربة حيت لبياع و شراي فنان فهادشي يعيق بيك مزير يركب عليك هو را ماشي ممزيانش ولا نصاب راه مهنة حلال بنادم كايضرب على راسو غير هو دكي و متمرس في المجال نتا ضارب تمارة و خاسر فلوس زريع و لحرث و الجني هو خاسر عليك تليفون و كاميو نتا زرعتي  في أربعة أشهر هو بايع فنهار…الله يسخر ليه و ليك..حاجة اخرى فكر فصطوكاج سول على راسك عوض تخسر فالمحصول 5دراهم او اكثر ممكن تصطوكيه ب 4 دريال لكيلو فلفريكوات ماشي ضروري تجني وتبيع صطوكي وتسنا ثمن يطلع..حاجة اخرى حاول تنخرط فتعاونيات حيت ملي كاتخدم بتعاونية كاتشريو سلعة كثيرة يعني ديما غاتجيبوها بثمن الجملة و نفس الوقت كاتنقصو من ضغط التنافسية نتا و ناس دوار و حتى ادا نتا درتي بطاطا لاخر يدير ماطيشة ولاخر بصلة و دائما ربح مقسوم حتى تراكتور و لماطريال ماتزيرش فيه تقدرو تشاركو فيه وتنقص عليك مصاريف.. وقدما نقصتي الوسائط او وصلتي للمستهلك نهائي كاتربح اكثر ماكينش غا سوق كاين فنادق كاين دار الايتام دار العجزة صبيطارات مطاعم معارض…..

بحال واحد سيد ملي طاح ليمون خرج كايفرق على لقهاوي ماحسش بدقة نهائيا منها بايع منها كايدير كليان..ماتسناش لبياع و شراي خرج بقشش فالاسواق الاسبوعية لخدام نزيدو كاميلتو و يخرج يبيع حتى هو الا غايدي معايا بياع و شراي 2دراهم نربح انا لخدام درهم و يخدم على وليداتو منها اجر و منها (لمش ماكيهربش من دار لعرس) راك فهمتيني…و ديما الأجوندا فدماغي نعرف متطلبات السوق الوطنية طيلة السنة رمضان شنو خصني نوجد و صيف شنو خصني نوجد حيت غانعرف راسي ديما بايع بثمن ماشي بحال داك خونا لي ربط لعجل فصيف وباغي يوجدو لوقت لبرد شهر 11 و 12ههه وباغي يخلي ليه ربح راه غايخلي ليك غا سنسلة و لغبار و لخاوي ديال لعلف هههه …. و حذاري ثم حذاري من أخطر فيروس كايضرب ليك سلعة هو ماشي بخوشة و لا حشرة هاد لفيروس هو داك جارك لي يقوليك باغي تزرع لبطاطا؟ لا لا ماخداماش ليك درتها و ماصدقاتش ولا دارها لحاج زعطوط و كلا فيها دق هداك كايفشلك لانه ممكن هو ماعرفش يبيع أو لا باع و ربح و ضربهم طاسة و غير دلك  ديما عطي ودنك سمع من بزاف ديال ناس ماشي غير واحد داك جارك ممكن ماعندو حتى ريال و كايفتي عليك..ولحاجة لي دارت ثمن فسوق لمرة جاية هرب منها حيت كلشي غايديرها…نضرب دورة فسوق ديال الجملة نجمع نوامر على الاقل شي نمرة فيهم غاتنفع واخا تعرف غا السوق كيداير و ديما تقول راني عندي واجد ماشي عاد باغي نزرع باش ماتبانش داوي خاوي و تجيب لخبار الصحيحة كاع لاحصلك البياع قاليك غدا نجي نشارجي قوليه سلعة مبيوعة نوجد ليك مرة جاية وهانتا عقتي عليه غا بالفن و نفس الوقت بينتي راسك و عطيتي للمنتوج ديالك قيمة واخا مازارع حتى وزة..هادو من سياسات ديال لماركوتينغ Marketing حيت شركات و التعاونيات برة من بعد لاكريز لي عرفتها اوروبا بالخصوص فرنسا و ايطاليا بين 1980 و 1990 بسبب الفائض ديال الانتاج صبحو كايبيعو المنتوج قبل مايزرعوه و ياخدو لعربون من لفوق بلكونطرا طبعا في جميع المجالات ماشي غي الفلاحة..يعني حاول تخرج من دائرة سوق و البيع على جوانب الطريق حاول تخلق لراسك زبائن مباشرين من المدينة دير لراسك دعاية ضروري عندك عائلة بني عمك فالمدينة عرض عليهم المنتوج حيت احسن و اسرع دعاية هي “bouche a oreille” يعني واحد يقول لواحد..لاكنتي بعيد على مراكز البيع من الاحسن دير تشجير زرع الفواكه 4سنين تبدا تجني عندك جوج و لا غلا وحدة فالعام ضرب ضربتك و رجع لور و ممكن تزرع وسطها الخضرة بينما وجدات الفاكهة…

و أخيرا كانأكد ان الفلاحة زينة و فيها مايدار شرط انك تكون دكي و تنوع المنتوج عندك غي 2هكتارات ندير هكتار كورجيط و هكتار بطاطا حاجة تكالي على حاجة و فنفس الوقت ماتملش وتقنط و تبدا تشكي و بلا ماتحس تبدا توصل فكرة سلبية على الفلاحة لجيرانك و صحابك و تفشل كلشي كيما كايقولو لميليارديرات لكبار لي بداو من الصفر = ماديرش البيض كامل فسلة وحدة -حاول توفر 10% من الرباح 5%خزنها و 5% زيدها فالاستثمار باش تكبر المشروع باش واحد نهار ماتسعاش  البنوك  -ماتشريش شي حاجة مامحتاجهاش حيت تقدر واحد نهار تبيع شي حاجة لي نتا محتاجها..

كون راجل و خدم أرضك ماتكونش الحاج زعطوط……

المحيط الفلاحي : رياض وحتيتا