خبير فلاحي يكتب .. هذه 10 نصائح مهمة لاختيار أجود أضحية

السلام عليكم و رحمة الله و بركاته إخواني أخواتي في الحرفة ، بلا شك ان حديث الساعة هو خروف لعيد و السوق كيداير..المهم فهاد المقال هو كيفاش نشري الاضحية ديالي أو بمعنى آخر كيفاش نختار لمليح…هادوك الأسئلة ديال المرقد منين واش مشرى ولا ولاد نعجات متجاوزة لأن لكساب و بكل صرحة ماعمرو يعطيك راس لخيط حيت دخلتيه لأسرار المهنة مادمتي داخل عندو لتيران غايقوليك مرقد ديال لقراقرة غاتقوليه تبارك الله ونتا ماعارفها تا فين جات مثلا ههه…و لكن مافيها باس تسول باش دخل معاه فنقاش و دردشة قبل ماتقلب عالله ينقص ليك شي بركة فلخروف..ماعلينا…كيفاش تختار لخروف بكل دقة باش ماتلفش

1. غاتراقب حالة الخروف الصحية غاتجرو من قرونو إلى استسلم و بقا جامد عرفو راه مريض مهلوك ويلا قاومك ولا هرب عرفو بصحة و نشاط

2. باش ماتلفش غاتبدا براس (عينيه كايلمعو ماشي بيضين و لا حمرين-نيفو ناشف ماكيسيلش-فمو مافيهش ريوق ناشف-سنان لحليب باين و تني باين غي رد لبال كايكونو ناجرين ليه سنان وحاكينهم كايبانو سنان لحليب ولا كحلين كايكون عالف لميلاص-لها ديالو يكون صافي مافيهش بقع را بحال لبهق-وسط ودنيه مافيهش بخوش ورا ودنيه ماملحوسش تونية ولا أمراض جلدية)

3. غادي دوز يديك محلولة فوق ظهرو الا ماتتناوش ريوس ديال صباعك يعني ماقصتيش لعظم عرفو سمين ويلا تتناو ريوس ديال صباعك و دخلو لداخل عرفو ماسمينش يعني غاتشوف تمن بالمقارنة مع الوزن

4. لكرش ديالو ماتكونش قاصحة غادير يديك بجوج كل وحدة من جهة و خلخلو راه تقدر تحس بلما لداخل كايطنطن لداخل عرفو را شبعان ملح يعني شارب لما مزيان كاينفخو

5. لفولات يكونو مكتاملين و دوز يديك تحت كرشو جيهت دكر ديالو ماتكونش منفوخة حيت فبعض الاحيان كايكون محصور ولا دير قضية اخرى غادي تشد ليه نيفو مع فمو واحد 10ثواني غايقوس ظهرو بحالا غايبغي يبول و فغالب الأحيان ملي كاطلقو كايبول و لا كايقطر لابال مزيان ولا تقوص بحالا غايبول را كايبان بحالا باغي يبول و محصورة فيه لبولة هاداك عطيه بتيساع…

6. غادير يديك ورا ديالة ديك لحيمة لي كاتغطي لمخرج غادي تحسسها تكون غليضة و قاصحة ماشي قاصحة بزاف غير ماتكونش مشحمة و تكون ديالة فايتة ركبة طبعا ليصح فيه الذبح..

7. لفراقش يكونو مقادين ماشي عوجين و غاطلقو يمشي قدامك تشوفو واش غادي مستوي ماكيعرجش..

8. غادوز يديك و عينيك على نصف تحتاني ديالو كامل ماتكون فيه حتى حبوبة ولا ولسيسة..

9. تقدر تهزو من لور باش تقدر وزنو واخا هادي حرفة الجزار انا براسي ماتعلمتها حتى دوزت صطاجات فسواق كنت كانهز خنشة ديال 25 كيلو شعير ديما ديما حتى بديت نشد ليها لعبار و نكمل لكيلوات بعقلي…

10. غالبا لخروف لي عالف لبزقة ديال دجاج ولا لخميرة كادوز يديك بين رجليه لورانيين و شم يديك غادا تعطيك ريحة دجاج و غاتلقا اصلا ديك لبلاصة منفوخة بحال لبونجة و مدسمة بزاااف..

هادو 10 طرق انا متأكد لا تبعتيهم عرف راسك راك معيد بلمليح..سيادنا الله يديم المحبة و التعاون بيناتنا و يسهل على كل مومن و مايخطا لخروف حتى دار يكون كلشي فرحان و معيد…

للمشاركة في القناة إليكم الرابط : https://cutt.us/1d9ex

رياض وحتيتا : مستشار فلاحي معتمد من وزارة الفلاحة