“المحيط الفلاحي” ترصد أجواء السوق وشراء العجول

صباح الخير ياجماعة الخير، اليوم غاناقش معاكم موضوع بخصوص شراء لعجولة من السوق و أجواء السوق بطلب من قراء “المحيط الفلاحي”  المقبلين على هاد لحرفة…
باسم الله توكلنا على الله نوينا نصبحو فسوق باش نشريو لعجول…
اول حاجة مانمشيش بوحدي واخا تكون حرايفي سوق غدار لاماخفتي من لبهيمة تخاف من مولاها… ندي معايا شي واحد ثقة ولد دوار واخا غير يحضي معاك لعكة يعني يرد لبال لشناقة يلصق فجنبك…وصلتي لسوق جيتي فطوموبيل ماعمرك دخل معاك لفلوس كلها خلي فلوس رشيم (لعربون) و الباقي خليه فسيارة فشي بلاصة آمنة ملي ترشم لبهيمة يخرج معاك مولاها حسب ليه فلوسو فوق لكوسان لا مشيتي على رجليك ديما فرق لفلوس كل 5000درهم ديرها فقنت وماتنساش لوازم سوق (لبيل و زرواطة) باش يعرفوك شاري و مداوم على سواق ماشي غي جاي تكتاشف…على مولانا فدخلة ديال السوق ماعمرك تزرب ضرب دورة شرفية على السوق ونتا راك عينك ميزانك يعني غاتجيب خبار لعجل سمين و لعجل صغير و لعجل نص تقليبة (أي حوالي 6أشهر بمعدل 250كيلو حتى ل 300كيلو) غاتسولني و باش غانعرفها غانقوليك كاينة صمطة ديال لعبار كاتباع عند البيطري ب 190درهم كاضورها على صدر ديال لعجل و كل عبار عندو الوزن ديالو…على بركة الله…جبتي خبار السوق بشوفة غاتسولني ما هي هذا  شوفة شنو خصني نقلب غانجاوبك ملي كاضرب دروة فسوق غاتشوف لعجل واش موجود ولالة و غاتشوف شنو لي موجود بزاف حيت لي موجود بزاف هو لي غايطيح فثمن مانساوش صاحبك لي معاك راك ماديتيهش غير يضرب أتاي و شفنج راه غادي يضرب دورة حتى هو فالسوق و يسول على الاثمنة من الأحسن تفرقو مع دخلة ديال السوق ماكاتعرفو ماكايعرفك…باش مايعبروكمش سماسرية هدا معامن جاي…من بعد غاتبدا تقلب لبهيمة لخاوية مايهمكش سمونية حيت نتا جاي ضرب لهوتة و تسمن راسك غادي تقلبها بشكل الآتي….
1.صنطيحة تكون عريضة.
2.غاتجر جلدة تكون رقيقة يعني لعجل فيه مايهز لحم جلدة الغليضة كاتعطل السمونية.
3.غاتجي لعجل من لور غاتشوف رجليه يكونو متوازيين ماعوجينش.
4.تقلب لفولات بيديك يكونو كاملين.
5.تجر ديالة لعندك تشوف لعجل واش غايقوس ظهرو ولالة لا قوس ظهرو ماخدامش ليك مريض بسينتة او برودة…
6.غاتقلب ليه سنان (سنان لحليب او تني او رباعي)
7.غاتحل ليه عينيه و ضرب فيهم ل” pile ” لا كان مازال لحال مظلم خص لعين تكون صافية ماتكونش صفرة(بوصفير) او لمومو ديال عينيه باهت (مرض جلالة)
8.غادي دور بلعجل وعينيك على جلدة مايكونش فيه جربة (أمراض جلدية) او زغب ملحوس (نقص فلكالسيوم و أملاح معدنية) ماتنساش تقلب حتى ورا ودنيه
9.لعجل خصو يكون واقف و عالي راه من شوفا يبان ليك واش قافز و لا ميت مسهوت .
10. الظهر يكور مستوي .
11. غادي دير يديك تحت صدر بين الرجلين الأمامييت ديالو و حاول دفع لفوق مزيان..علاش؟ حيت الابقار أي حاجة كلاوها ثقيلة بحال سلك كاتحصل تما يعني ملي نتا غاتدفع من لتحت لعجل غادي يغوت ربي لي خلقو تما غاتعرفو صارط سلك و مولاه باغي يتهنا منو…
12.ماتنساش دور مع صاحبك را ماكينش غي سوق واحد مزال تحتاجو حيت باش تفيق ف3ديال صباح و دخل تغيس فسوق و ماليك لا ناقة لا جمال صعيبة شوية يعني خصك تحفزو باش تلقاه وقت الشدة….
جميع المواصفات المطلوبة لقيتيها ماتزربش فلمشرى رباح فلمشى ماشي فلبيع غاتسول على ثمن و ماتعطي والو فيه زيد و خليه دوز قلب بهيمة اخرى و نتا غادي…درتي سوق كامل رجع بدا تعطي فالاتمنة و مازال ماخصكش تزرب نتا جبتي خبار سوق صاحبك كايدور من وراك لي عطيتيه مثلا مليون صاحبك يعطيه 190 الف رقد شوية السوق ملي تفاهم رشم لبهيمة و ربطها و خرج خلص مولاها و الله يدخلها عليك بالصحة و العافية…
* المحيط الفلاحي: رياض وحتيتا