تمويل المشروع الفلاحي ،وسيكولوجيا الفلاح المغربي …(تتمة)

تانيا ،تمويل المشروع الفلاحي …..
بعدما بينا ان الفلاح مشوش وماعارف منيني يبدا وبلي الفلاح المغربي تحت الضغط ،سوا عندو راس المال سوا ماعندوش ،بينا ايضا ان الدولة المغربية وضعات الاطار العام للعمل الجاد والمدروس ،وفتحات الدولة البيبان ….الاوراش الكبرى ،تنزيل الدسور الجهوية ،المبادرة ،البرامج القطاعية ….وفتح افريقيا (سوق) ،….رجعنا يافتاح يارزاق ،وبدينا نقلبو على اسباب النجاح واسباب الفشل وبدينا البحث على الامكانيات لي عدنا والتهديدات المحتملة ….قبل ما نغرق في الدعم ،”الاعانة ” لازم ما نشير مجموعة من الاساسيات في البحت عن التمويل ،الفلاح لي هارف على الورثة بلاصتو ما كيناش معانا ،المقصود صفي تشرب يعني الوثائق وما ادراك ما الوثائق ،مغرب اليوم لي قالك عندي لبلاد قوليه عندك وراقيها ،بمعنى الا كانت الارض صافية من النزاعات ومفيهاش المشاكل ،سجلتي نقطة ايجابية في الترافع لي الجاي ،ايضا الفلاح لي معندوش مع التطور ،يقرا شويا الا يبدل خبار السوق .
اذا انا موجود وراقيك مزيانين ما كاين حتى مشكل ،
الخطوة الجاية تحرك الا كاين شي رخص بدا تجمع ،والا كنت داير شي حاجة بلا رخصة دير تسوية الوضعية ،
نفتارضو الفلاح عرف الاطار العام وستوعبو ،لي هو الدولة مادة ايد الرحمة للفلاح المغربي ،….اه نسيت ما كنتكلمش على مخطط المغرب الاخضر ،هذ المخطط جزء من حلقة ،وكيمثل يلا عشرة في 100 من دعم الدولة الفلاح المغربي ،باش مانضيعش الوقت وباش ما نتفلسفش عليكم،الفلاح المغربي يفتح موقع الوزارة الا كان ما قريش عمر لولدو راسو بالموضوع ….
الوزارة ….معاك في كلشي من البداية غير كون سيدي مولاي …الزرع ،تنقية الارض ،حفر البير ،بناء الاستطبل ،التجهيز بالتنقيط ،دعم ومساهمة من الدولة للفلاح بشكل مباشر ،يعني كشخص ذاتي ،ويمكن ليه يستافد بوجهو حمر ،الا عرف يترافع على راسو ،ترافع هو نعام السي دراسة تكون مطرقة ،ودراسة مالية وتقنية ودراسة السوق ….والا كنتي ما كتعرفش قصد شي مكتب دراسات وبدل العقلية وصير لفلوس على شغل عوض ما تبقى تصير على الدولة ،ومعاها تكون حركتي الشباب لي شبعان افكار وعندو روح العمل المشترك ،ارا دابا نعزو شويا القوى الترافعية ديالك باش تقنع الجهة المانحة او المدعمة ،كيف ذلك؟
نرجعو يد الله مع الجماعة ،ونرجعو الدوار والجماعة ،ونرجعو الاطار الخاص …..لي هو الجمعيات والتعاونيات وشركات الاشخاص والمقاول الذاتي …والاتحادات وحتى الجماعة الترابية معاهم ،فلاح المطور كيجي لدوار واسس تعاونية فلاحية ،وحل عينيه بطريقة تشاركية ،حول المنتوج المجالي (المحلي )،وتاريخ الفلاح مع الزراعة في المنطقة ويبدا يرتب الافكار ،وصيغها في اطار قانوني في شكل تعاونية فلاحية ، تعاونية فاتحة خير على الدوار ،اوا اسيدي خبار السوق تجي عندك مع التعاونية ،وولي عندك الحق توصل المعلومة بكل سهولة ،اذا يافتاح يارزاق ….ندق البيبان ….
وزارة الفلاحة ،المديريات الجهوية والاقليمية ومراكز الاستشارة الفلاحية ووكالة التنمية الفلاحية ….والجمعيات لكبار لمربي المواشي …وهكذا طرقتي مسمار المغرب الاخضر ،صفي تشرب هذي دعامة الثانية ،الامتياز لي عند الفلاح المغربي هو ان الدولة تتعامل مع الفلاح سوا كشخص ذاتي او مؤطر في تنظيم شخص معنوي ،علاش امتياز لان الجهات المانحة الاخرى ،ما كتعقلش على الفلاح كشخص ذاتي ،في هذ الحالة كولي ضحية ،وكولي مستفيد يستفاد منه في لائحة طلب الدعم ،
بالتعاونية تتحلو بيبان الفلاح المغربي ….،ويمكن ليه تعامل ووقع شراكات محلية ووطنية ودولية (مثال الفلاح الصغير لي كيصدر النعناع )،
نعام السي الفلاح ،كاين المبادرة الوطنية للتنمية البشرية لي هي ورش ملكي ،كيقوم على ثلاثة المحاور موزعا على اربعة او خمسة برامج ،هذ المحاور هي ،
التصدي للعجز الاجتماعي بالأحياء الحضرية الفقيرة والجماعات القروية الأشد خصاصا.
تشجيع الأنشطة المدرة للدخل القار والمتيحة لفرص الشغل.
العمل على الاستجابة للحاجيات الضرورية للأشخاص في وضعية صعبة.
ولي اكيد كتقيص الفلاح ،لكن باش توصل المبادرة لازم عليك تحتارم دليل المساطل لكل برنامج من برامج الدولة ….يا فتاح يارزق ،حرك عليها سوارت الربح وقصد العمالة وسول على دعم الدولة المشاريع المدرة للدخل والشغل ،….كتبقى دائما في الاطار الخاص ،تعاونية جمعية ،شركة اشخاص ،مقاول ذاتي او جماعة ترابية ….
ايضا المندوبية السامية للمياه والغابات عندها برامج مثلا (وقت الغرس هذا ) يمكن لك توجه طلب الادارة ،مارس تتسلم وحدد ارضك ونظم الشغل ،يافتاح يارزاق ،
وزارة التضامن …..وااااخوت الفلاحة تفكرو المرأة لي كتفيق مع النبوري وتوجد لفطور لدار ،وتحلب وتحطب وتعجن وطيب الخبز ،وتوجد لغدا وتوكل البقارات والمعايزات وتشطب الكوري وتركد العباد ،وتسد البوطة عاد تنعس ،تفيق الاولى والتنعس الاخيرة ،الوزارة عندنا برامج دعم التمكين الاقتصادي للنساء خاصة المراة الفلاحة في وضعية الفقر ….اذا كاين مايدار ،وااا اسس الجمعية ديال الدوار وتكلم وجيب مشاريع المراة الفتاة والشباب ،الفلاح خاصو كون مؤثر في المحيط ديالو ،اكيد هي تنمية اجتماعية غادي تقيصو ،حيث هو راس الحربة في الدوار والمغرب (المنتج)
المهم البرامج القطاعية ،قلب تلقا …..كاين نعام السي المنظمات غير الحكومية الوطنية ….لي كدعم الفلاح الا كانت كتقاطع معاه نفس الاهداف ،وعدنا مثال ديال اركان لي تم الثتمين ديالو بعدما كان كياكلو الماعز وبقا مليوح ،هنا الفلاح رد البلاد ليكون ضحية ديال شي تنظيم اولا مؤسسة تغرقو ،خليك مع الدولة احسن والا كانت زاعم ،درس المسائل وعليك بمكاتب الدراسات
هناك ايضا المنظمات الدولية لي يمكن تدرس مشروع التعاونية ،وكان منو تقدر تمولو بكل سهولة ……
بقات حاجة مهمة شحال من فلاح كيقول ،كيطلبو مني النسبة ،30%، او اقل اواكثر ،متخممش الدولة عندها تجربة والمنظمات الدولية عندنا تجربة ….كانو كيخليو الدعم 100%، لكن الفلاح المغربي الا عطيتيه 100% فرررط ،هذا علاش جات فكرة ساهم ،شخصيا ،تتبعت مشاريع فين نحل طار ،فين لبقر مات ….حيت مدعم مائة بالمائة .
اذا ،بينا بلي كاين مايدار يافتاح يارزاق يد الله مع الجماعة ،نوصيك عزيز الفلاح الا قدر الله وقتنعتي وبغيتي تكون معانا ولد الوقت ،فكر وبني رؤية وخطط ونفذ ومتلفتش لازم المغامرة والارادة والتوكل على الله
حافظ على التعاونية او الجمعية من لخمااااج السياسة وشد المعقول المؤسساتي ،تلاقا الدولة بجنبك ،
نفسية الفلاح المثأترة صح ،لكن لازم العمل وفهم سياق بلادنا الغالية تحت قيادة رشيدة محسودين عليها ،
يد الله مع الجماعة ،ومن زرع حصد ومن حصد زرع ،قريناها في الابتدائي ،واليوم يد في يد نحقو اكتفاء ذاتي ورسمو مغرب النموذج التنموي الجديد .
عبد اللطيف البيضي
وكيل التنمية الاجتماعية
الكاتب العام لجمعية عالم الفلاحة التضامنية القروية
لجهة الدار البيضاء سطات