والفلاحة تعالو نهضر معاكم في تعويم الدرهم و علاقته بالاقتصاد الفلاحي بالمغرب

والفلاحة تعالو تجمعو نشربو واحد لكاس ديال أتاي بغيت نهضر معاكم فالجديد…هاد الموضوع ماعندو علاقة لا بتقنيات الزراعة و لا تربية الماشية لكن عندو علاقة بالاقتصاد….، و الاقتصاد ديالنا داخل فيه الفلاحة بطبيعة الحال غانهضر ليكم على تحرير الدرهم في السوق العالمية و شنوهوما الاجابيات و السلبيات على النشاط الفلاحي بالمغرب ديالنا حسب تحليلي الخاص…مؤخرا البنك المركزي … أعلن على تحرير الدرهم فالسوق العالمية لي غاتبدا الاجراءات ديالو فنصف الشهر  بداية سنة 2018 بشكل تدريجي ماشي بحال فمصر…نفهمو بعدا شنو هو هاد المصطلح و كيفاش بلان هاد ”تحرير سعر العملة ؟ “
فالاقتصاد العالمي كاين واحد نظام تبادل Régime de change هاد نظام فيه جوج انواع…النوع الأول هو نظام ثابت هو لي غادا بيه بلادنا أي أننا مخبيين وراء الدولار بنسبة 40في المئة و الأورو بنسبة 60في المئة من المعاملات الخارجية يعني لا نزلو حنا معاهم لا طلعو حنا معاهم بحكم اننا كانتعاملو غير بدولار و الاورو فالمبادلات الخارجية (استيراد-تصدير) و النظام الثاني هو نظام متغير هو لي غادي ندوزو ليه تدريجيا كيما سبق لية دكرت (تحرير الدرهم) .يعني : فالمرحلة الاولى غادي يبدا بنك المغرب يكونطرولي درهم و دلك بوضع حد ادنى و حد اقصى لسعر درهم غير يحس بالخطر غادي يتدخل… و من بعد (المرحلة التانية) فاش غادي يبان باللي داكشي غادي مزيان و ماكاينينش مشاكل فالاقتصاد المغربي غادي يتحرر بشكل كلي و غادي يخضع لقانون العرض و الطلب في المارشي تاع الشونج …. يعني الا كان الطلب على الدرهم المغربي و الناس بغاتو غادي يطلع فالتمن و الا كانت الحركة ناعسة غادي ينزل (قانون العرض والطلب)…زربت عليكم بهاد الجملات الاخرين..واخا..دابا حنا بنك المغرب و كأي دولة أخرى عندنا واحد لخابية كانعمرو فيها العملة الصعبة لي كاتجينا من
-السياحة: يعني جاو سياح و لا زماكرية فصيف جابو العملة صرفوها هنا كاتمشي نيشان ديك العملة للخابية..
-التصدير: يعني صيفطنا ماطيشة..خضرة..فوسفاط للخارج كايخلصونا بدولار أو أورو حتى هو كايمشي للخابية…
-استثمارات خارجية: يعني جاو الخليجيين بناو عمارات دارو شركات كايدخلو العملة للبلاد ديك فلوس كاتجي دولارات و كاتصرف دراهم و دوك دولارات كايمشيو لخابية…
و حاليا دخلو حتى البنوك التشاركية لي حتى هوما غايدخلو زبالة ديال فلوس بالعملة باش يبداو يتعاملو بيها هنا…
ملي كاتكون عندنا ديك لخابية ديال بنك المغرب عامرة بالعملة الخارجية ماكانخافوش على اقتصاد البلاد…علاش؟…….حيت عندنا الاحتياط باش نجيبو حاجياتنا الضرورية من برة بحال مثلا قمح…عدس..نفط..غاز..إلخ ولي كاتمثل 85في المئة من الواردات الأساسية ويلا كنت خاوية خصنا نشريو العملة الصعبة بفلوسنا و هنا كانطيحو فعجز مالي صعيب …دابا كانظن فهمنا لبلان كيداير…نكملو…ملي غادي يحرر المغرب سعر الدرهم فالعالم غادي يولي كايعوم حتى هو مع العملات لوخرين… اي غادي يصبح خاضع لقانون العرض و الطلب يعني لاكان الطلب على درهم غادي يطلع سعر ديالو ويلا ماكانش عليه طلب غادي يضربنا لخلا…كيفاش..؟ دابا لنفرض ان المغرب بلد صناعي و فلاحي يعني اننا كانصنعو شي حاجة شنو هي الله أعلم حيت ماكاتبانش لية شي صناعة صحيحة فيها (صنع في المغرب) من غير لخراقي ديال الحمام و جلالب وتكاشط..لكن مافيها باس نحلمو شوية..واخا..المغرب كايصدر منتجات للخارج.. مع تحرير هاد درهم غانقولو ليهم لا ماتخلصوناش بالاورو ولا دولار خلصونا بدرهم..غادي ينوضو هادوك البلدان لي مصيفطين ليهم سلعة يشريو درهم باش يخلصونا..ولا صيفطنا خضرة ولا فواكه غادي تم العملية بنفس طريقة يعني غادي يتزاد طلب على درهم يعني غايطلع سعر ديالو و هنا غانوليو حنا هوما لمريغلين….ويلا ماكنا كانصدرو حتى وزة حتى حد ماغايتسوق لدرهم و هنا ماغاينفعنا لا درهم لا سبعة رجال هههه…اشنو غايوقع سعر درهم غاينزل لأدنى حد بالمقارنة مع العملات المنافسة كالدولار و الاورو حيت مابقاش بنك المغرب غادي يكونطروليه و هنا غادي نطيحو فتضخم و زيادة في الاسعار عندنا فالبلاد..نفهمو كيفاش…نعطيكم مثال مادمنا ولاد دومين..غايولي لي كايجيب الابقار من اوربا خصو يخلص بالأورو و الأورو يعلم الله شحال غايولي بالدرهم إلى ولا غير ب 20درهم را البقرة لي كاتقام عليه بمليون و نص واصلة للمغرب غاتقام عليه ب 3مليون و هو غايبيعها ب 4مليون و الفلاح لي غايشريها غايزيد فثمن الحليب وشركة إنتاج الحليب  غاتزيد فثمن الحليب و المستهلك هو لي واكل دق…أما الفلاح لاجاتو غالية و ماشراش البقرة زيد فلاح على فلاح على فلاح..غاينقص لحليب فالبلاد و الدولة غادية تضطر انها تستورد لحليب غبرة و خصها تخلصو بدولار ولا اورو و هاااااحنا رجعنا لنفس المشكل هو ان درهم ماساوي والو قدام أورو…انا عطيتكم غير مثال ديال بقرة..اما راه لعجب المعجب كانجيبو من برة في المجال الفلاحي (ابقار عجول الات فلاحية و زيييد و زيد…) ههه ماشربتوش اتاي ههههه…المهم انا تكلمت على الجانب السلبي..لكن مانسبقوش الاحداث…هاد السياسة النقدية تاتهدف للحد من خسارة قدرة الإقتصاد المغربي التنافسية مع شركائها الأساسيين و تكون عند درهم قيمة عالمية… لدلك كانطلبو من السلطات المالية بلاغ مايدخلو في مغامرات اقتصادية مجهولة في ظل عدم جهوزية الدولة ويكون تعميم تدريجي لدرهم و هادشي اصلا لي غادا بيه دولة الحمد لله عندنا ادمغة خطيرة فالاقتصاد و داكشي علاش حتى سيدنا الله ينصرو ربط علاقات اقتصادية قوية  مع افريقيا باش بعدا نلقاو اسواق خارجية فين نبداو نبيعو و كدلك الحكومة رخصات بدخول الابناك التشاركية باش دخل فلوس كثيرة نعمرو ديك لخابية را جانا لعطش ههه…و كانطلبو حتى من وزارة الفلاحة بدورها تكون  فاعل اساسي في ازدهار الاقتصاد تحفيز المقاولات صغرى و المتوسطة باش حتى هي تكون مؤهلة انها تقلب على اسواق خارجية حيت لا خدمات هاد المقاولات راها غاتصيفط سلعة لبرة و غاتعمر ديك لخابية ديال بنك المغرب و من جهة اخرى غادي نقدرو نحققو الاكتفاء الداتي من المواد الاساسية كالقمح مثلا…و يبقا درهم بعزو…..

المحيط الفلاحي: وحتيتا رياض