موقع ووردبريس عربي آخر

مشروع تربية الابل و طرق تثمين المنتوج بالمغرب…

السلام و عليكم ورحمة  الله وبركاته احبائي في الله قراء مجلة “المحيط الفلاحي” ،   أجدد اللقاء معكم اليوم في موضوع مهم جيدا الا و هو مشروع تربية و تسمين الابل..نعرفو بعدا هاد المخلوق و شنو هوما مميزاتو و مؤهلاته للتعايش مع بيئته..الابل ماشية الصحراء مخلوق صبور تعطى به الحكمة و ضربت به أمثال عديدة في العالم العربي: (اعقلها و توكل على الله-ٱخرها أقلها شربا..و عندنا حنا لي فراس الجمل فراس الجمال ههه….الخ) ،يمكنه تحمل العطش و الجوع اما في حالة التغدية فله شفة عليا مقسومة إلي نصفين طوليا تعمل عمل الاصابع في التقاط العشب اما السطح الداخلي فمغطى بغشاء يتحمل الاشواك المتواجدة في بعض النباتات و يحتوي سقف الحلق على طبقة مخاطية ناعمة تعمل على ترطيب الفم وبالتالى تعتبر عاملاً مساعداً يقلل شعور الحيوان بالعطش باختصار فهدا الحيوان له قدرات عالية على تحمل ابسط ظروف التغدية و المناخ…

شروط تربية الابل ….

اولا من بين شروط التربية لي لازم تكون هي الحضيرة فين غاتربي الابل خصها تكون طبعا عالية مهوية و فيها مكان لرعي نهارا “Padok “محاطة بصور لا يقل عن 2.80متر لوكالات و شرابات عاليين بمتر على الاقل و يكونو وسط الحضيرة لان الابل بطبعها تحوم بجنبات الحضيرة لي كاتحتاج ل20متر مربع كمساحة لكل رأس من الابل اما في حالة الانتاج المكثف ف12متر كافية لإيواء كل رأس من الابل بالنسبة لمداخل و مخارج الحضيرة المغطاة لازم تكون على علو 2.5 متر على الاقل عاد مانساوش طبعا كيف حضيرة الابقار لازم مكان الولادة و مكان لعزل الابل المريضة و بالنسبة الاصناف الموجودة بالمغرب نذكر (گرزني-خواري- ولي عندها انتاج عالي فالحليب سميتها مارموري…)…هو لي معروف ان مدة حمل الابل طويلة تقريبا 365 حتى ل395يوم هادشي ممكن يعطينا تصور مبدئي انه مشروع بعيد المدى و خصو الصبر و النفس الطويل خصك تسنا عام عاد تولد عاد تفطمو عاد تسمنو لكن كاين منتوجات اخرى لي ممكن تستافد منها خلال سنة الحمل نهضرو بعدا على التسمين ممكن توضاح الصورة و تبدلو رأيكم في موضوع الصبر ههه…ملي كايتزاد الابل بوزن تقريبا بين 50كلغ كايبقا مع مو عام عاد كاتفطمو كايتزاد تقريبا ب650 غرام في وزنه يوميا مع يعني كايوصل وزن ديالو عند الفطام 240كلغ بغيتي تبيعو كاتبيعو ب 10000درهم بغيتي تسمنو كاتزيدو بين 8 اشهر و عام بنسبة 1.50% ديال العلف من الوزن ديالو و كاتبيعو ب 20000درهم بوزن 450كلغ فيها نسبة 66% من اللحم يعني لي غايدبح غايبيع ب 60درهم//كلغ عاد زيد شحمة ديال سنام يعني ديال الظهر و كايقولو ليها حتى (ذروة) كايبيعها ب 150درهم للكيلو لانها مفيدة جدا جدا و جلد ديالو حتى هو يعني هنا توضحات الامور و غاتقدر تحط راسك ف سيركوي لي بغيتي اما تسمن و تبيع ولا تشري واجد و دبح و تفصلو تبيعو كل حاجة لماليها ولا تسمن و دبح وهاد المعلومات مأخودة من عند لحرافية و المربين…

فوائد حليب الابل ….

الان سنمر للانتاج القريب المدى لي هو الحليب..حليب الابل مهم مهم جدا وباش مانطولش را دير غير فوائد حليب الابل فانترنيت تلقاها و أهمها انها مضاد للسرطان…نهضرو على ثمن و كمية الانتاج كيما دمرت لفوق حسب صنف الناقة يتراوح الانتاج بين 5 الى 15 لتر من الحليب يوميا و كايتباع ب 10دراهم/لتر عاد لا كانت تعاونية و حلقات ليه على لومبالاج را تبيع بأكثر يعني ضرب حسابك هادي فهادي و شوف شحال شهريا..نهضرو كذلك على بول الابل لي فيه فوائد كثيرة للشعر و الربو و و و المهم ثمنه ماعرفتوش ههه…لي عرفت هو كايزيدوه فالحليب و كايشربوه و غاتلقاو جميع الفوائد ديال الحليب و الشحمة و البول في الانترنيت..لي بغيت نوصل فهاد المقال هو طرق التربية و تثمين المنتوج و كذلك تشجيع اخواننا على خلق تعاونيات لتربية الابل بالمناطق الصحراوية كدلك في إطار التنمية المجالية…و السلام عليكم ورحمه الله وبركاته…

رياض وحتيتا: المحيط الفلاحي

اترك رد

لن يتم نشر عنوان بريدك الإلكتروني.