الرئيسية » اخبار فلاحية » أخبار فلاحية » رياض يكتب ….كيفية تحسين سلالة القطيع عند الأغنام

رياض يكتب ….كيفية تحسين سلالة القطيع عند الأغنام

واحد السلام عليكم إخواني أخواتي في لحرفة…رجعت ليكم
اليوم بموضوع جدي و كايخص مربي الأغنام و هو كيفية تحسين سلالة القطيع…لي هدا هو وقتو…
بلا شك كثير من مربي الأغنام سنة من بعد سنة كايبدا يتشكا من الإنتاج ديال القطيع ديالو من ناحية اللحم و الوزن بالخصوص لاكان عندو عدد كثير و غالبا كايربط الانتاج دائما غي بسوء التغذية…لكن المشكيل جاي من لخروفات الأمهات (النبت) لأن المربي ماكايعزلش النبت لمزيان يخليه و لخاطية يسمنها و تخرج لسوق…لكن كيفاش هاد عملية لفرز و اشنوهوما المعايير التي يجب اتباعها باش يخلي “نبت” مزيان يخلف ليه مع الوقت تريكة زينة…غادي نعطيكم النقط المهمة باش تعزل لخروفة ديال النبت و لي خاصها تخرج لسوق في عدة سطور

1. الحالة ديال لخروفات وسط القطيع: ملي كاتسرح عينيك وسط القطعة ديال لخروفات كاتبان ليك مقموعة وسطهم لاكانت مازل ماعمرها ولدات فهي ممكن تكون فحالة طبيعية بحكم العمر ديالها لكن لي والدة خصها تكون طورات لحالة الفزيائية ديالها من نعجة لخروفة أي انها كاتغلاض ماشي سمونية و لكن على الاقل مايبانوش ليك ضلوع لان هاد لخروفة صعيب انها ترضع و من شبه المستحيل تجيب ليك خرفان وافيين…

2. العقم: من أهم المشاكيل بحالا كاتقولية مربي القرودة و كاتسنا منهم لبيض ههه حيت لخروفة عقمة كاتشرب و تاكل على ظهرك و الله يخلف عليك لذلك خصك تراقب كل خروفة واش والدة او لا واخا تكون عندك 1000 نعجة را كتاب و ستيلو قادر يفك ليك مشكيل التسيير يعني اي خروفة رقمها و قيد سميتها و ملي تولد ركب ليه طانكضة كتب رقم ولدها حداها و لي ماحداها حتى رقم صيفطها لسوق و نصيحة فهاد لحالة ديما سمن عاد خرج لسوق ماتخرجهاش هكاك حيت مصيرها لجزار يعني باش ماضيعش فيها بيعها لحم…

3. العروجية: ديك الفكرة ديال واخا نعجة عرجة ترضع… غي حيدها من بالك لانه النعجة لي عرجة كاتبدل مجهود كبير باش تحرك و اي مجهود كايأثر ليها على انتاج لحليب و كاضيع ولدها يعني غايكون عندك خروف مقموع…

4. حالة الخروف الابن: نعجات لي عندهم خرفان ضعاف ماتسناش منهم لخير واخا تقول راني عندي فحل مليح و لكن ها لفحل مليح ويلا ماكانتش النعجة ترضع مزيان را مايطلع لخروف كيف بغيتيه…

5. العمر: مابديتش بهاد النقطة حيت مسألة باينة نعجة رباعية و مافوق كاينقص انتاج لحليب و هادشي كايأثر بشكل مباشر على نمو الابناء.

6. الضرع: الوقت المناسب فين تقلب الضرع هو بعد الولادة كاتقلبو يكون وافي مافيهش لفتق لبزولات باينين كايخرجو لحليب كاملين لا لقيتي عكس هادشي كي تفطم ولدها حاول تبدلها…

7. السلالة: لا كنتي خدام على شي سلالة معينة ديما عينك ميزانك تبان ليك لخروفة بدات كاتفقد مميزات السلالة لي عندك اي بمعنى آخر بدات كاتبرهش بدلها…أما لا تكلمنا على التهجين هدا موضوع آخر…

8. نعجة مولات توام: مولات توام كاين لي عندو فكرة غالطة كايقول لا عندها توام خروف و خروفة ملي كايكبرو كايقول لخروفة غاتخرج عيانة بلعكس هاديك هي لي تخلي حيت عندها مميزات امها و عندها احتمال كبير حتى هي تعطيك التوأم حيت واحدة القدرة الجينية ديال الام و أمها زيد تهلا فيها بلعلف وقت الرضاعة

تربية الاغنام مشروع أساسه النبت لي هو لخروفة كيما كايقولو الأم مدرسة إدا أعددتها أعددت شعبا طيب الأعراق أنا كانقوليك الخروفة أم إذا علفتها أعددت قطيعا حسن المميزات…ولي فاتك بعدد نعجات فوتو بلفحل…

رياض وحتيتا 
مهندس في التكوين
مستشار فلاحي معتمد من وزارة الفلاحة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *