الرئيسية » مختارات » مشروع تربية و تسمين العجول…كيفاش نسير المشروع بعقلانية و دكاء مالي

مشروع تربية و تسمين العجول…كيفاش نسير المشروع بعقلانية و دكاء مالي

و الفلاحة وا جماعة لخير مبروك علينا شتا و لبرد لعام ضمن ولله الحمد الله يعطينا على قد النفع…ليوم موضوع نقاش هو لعجل هو الحب ديال لكسابة..هيبة و فخر و علاقة وطيدة بين المربي و الحيوان العشق الابدي للكساب واحد العلاقة لا توصف ملي كاتشوف عجل غادي كايسمان قدامك نهار على نهار و نتا كاتشوف منتوج و نتيجة مجهوداتك..سبحان من خلقه..لعجل واحد الحيوان تعطيه يعطيك تهلا فيه يبرعك البنكة ديال لكسابة كاتلقاه واخا داير الفلاحة ولا الخضرة و ضروري داير عجل ولا جوج كايخبي فيهم فلوس عام ماعمرو يخسرك المهم ضروري ترجع فلوسك فأصعب الظروف…لعجل مشروع عندو إيجابيات كيف ماعندو سلبيات و دائما على حساب ظروف التسيير و حتى ظروف التسويق لي حتى هي ممكن تحكم فيها باش ماضيعش غادي نشوفو علاش في عمق المقال..بالنسبة لي باديين مشروع العجل و كيما فهمت من رسائل لي كانتوصل بيها عبر الخاص ناس ماعارفاش باش يبداو و منين يبداو…..واخا…..غانشرحوا الموضوع من الجانب التقني و المادي…لا بغينا نسهلوا الفهم ديال مشروع تربية وتسمين العجول غانقسمها ليكم ل 3 أجزاء من المشاريع حسب مراحل التربية وعلاش قسمتها على 3 اقسام باش المربي المبتدئ يعرف فين يحط راسو و يحدد هدفو من الاستثمار على حساب جيبو و على حساب صبر و هادشي كامل باش نبين ليكم فين كايتجلا الذكاء المالي في تدبيير المشاريع الفلاحية و عقلنة تسيير باش تكون ضابط شغلك تقنيا وماديا وحتى بالتسويق على بركة الله..
*القسم الأول من المشروع: تبعوا معايا مزيان هاد الجزء فحد داتو مشروع تقدر تخدموا غا بوحدو و هو ملي كايتزاد العجل ديال نهارو شارب اللبة (الحليب الاول ديال الام فيه فيتامينات و مضادات حيوية طبيعية لاكتساب المناعة) غانعتبرو انك شريتيه لانك يالله بادي المشروع ماعندك لا بقرة لا جوج غادي تاخدو بين 4500 درهم الى جهد 5000درهم حسب الصنف أرخصهم هولشتاين و أغلاهم الأزرق البلجيكي و شارولي في حين يتمركز المومبليار في المتوسط أي أنه مليح و ثمن بين و بين…دخلتي 10ديال عجول ب 50000درهم اول حاجة النظافة ثم النظافة لتجنب الأمراض الشائعة و المعروفة مثل لادياري لي كاتجي من عدم نظافة لكوري ممكن يلحس البكتيريا غا من لحيط ضروووري تحط خنيشات ديال دواء anti diarrhée احتياط…. هنا كايولي عندك جوج طرق دكية للتربية و التسيير..
الطريقة الأولى: هي انك غاتوفر ليه حليب اصطناعي و تبن و علف ديماراج في 3 اسابيع الأخيرة قبل الفطام تقريبا غاتقام القضية ب 1500درهم ف 3 أشهر لكل عجل بحليبو بدواه و غاتبيعو للطماع بين 7000درهم و 8000درهم صافي كبرتيه فطمتيه ماعندك ماتعلف مازارع تالعبة حيد عليك صداع حبس فهاد المرحلة جيب طماع يطرطق معاك لاستيك رجع رزقك و خليه هو لي غايشدو من عندك غايدخلو هو لمرحلة التهيئ للتسمين كانأكد مرحلة التهيئ للتسمين مزال ماغايسمنوش و هادا قسم ثاني من المشروع….جاي فالمقال الموالي
الطريقة الثانية: طريقة دكية غاتلعب على جوج مشاريع في مشروع واحد و بربح مضاعف عندك اسيدي 10عجول غاتخرج لسوق غاتشري 5 بقرات كروازيات او قريبات لجموع يعني جموع اول ثمن بين مليون و مليون و 20 طبعا غادي تأكد من سلامة الضرع حتى بزولة ماباطلة و هيأة متوسطة انتاج بين 10 و 16 لتر (هاد المميزات دكرتهم في مقالات سابقة بالتفصيل باش مانقويش عليك المعلومات و نشتت افكارك) و الغرض من 5 ابقار هو ارضاع 10عجول من جهة (يعني غاتحلب و تعطيهم مع وضع علف ديماراج)و نفس الوقت غاتلقحهم يعني غاتعمرهم…من بعد 3 أشهر ولاو عندك عجول مفطومين گاباري واقف لانهم راضعين حليب اصلي غاتبيعهم حتى ل 9000درهم كأقصى تقدير و عندك بقرات ضارين فالشهر الثالث و نفس الوقت غاتعاود دخل بانضة أخرى ديال 10عجول بنفس الطريقة و رضاعة من نفس البقرات 3 أشهر أخرى غاتبيعهم كدلك و تربح فيهم ومرجع راسلمال و غاتولي عندك 5 ابقار ضارين فشهر 6 يعني خاصك تغرزهم (تحبس عليهم الحلب) بغيتي اسيدي تبيعهم دافعات راك غاتخرجهم حتى هوما بواحد مليون ونص مليون و 140 و هانتا رابح فيهم حتى هوما…بغيتي تخليهم حتى يولدوا راك غاتربح 5 عجول او عجلات ديالك و مرجع راسمالك و غاتعاود العملية من جديد و تسمى استثمرتي من رباح و غي بالفن و نتا هو المعلم…و هادشي كاااامل را مزال غير فالقسم الاول ديال مشروع تربية العجول يعني مرحلة وحدة من المشروع مزال القسم الثاني لي غاتخليه يضرب عندك 6 اشهر كيفاش و طرق التسيير و القسم الثالث لي غادي تجر بيه سنة من التربية و كل مرحلة بميزانيتها و حتى بالموسم ديالها من السنة باش طيح فسوق زوين…المهم قرا المقال و نفس الوقت ضرب حسابك من الاول باش توضاح لك الصورة….
و أخيرا غانقوليكم نوضو تحركوا خدموا راه كاين مايدار و جربو و غامرو ضروري طيح و تنوض و لكن الخايبة هي تنعس و تستحلاها و يمشي عليك تران.. انتظروا التتمة في مقالات قادمة….

شعارنا دائما جميعا يد في يد من أجل مغرب أخضر….

المحيط الفلاحي : رياض وحتيتا مهندس دولة في التكوين