رياض يكتب: نصائح للذبح و السلخ و تخزين لحم الأضحية….

السلام عليكم و رحمة الله وبركاته….إخواني أخواتي  نتمنا تكونو بيخير و على خير….موضوع اليوم هو طريقة الدبح الصحيحة لتفادي اخضرار اللحم…كان سبق لية كتبت مقال على نصائح لشراء الأضحية و هضرت فربورطاج على نفس الموضوع يعني غادي ندوز نيشان لشروط الدبح السليمة
1. نظف مكان الأضحية يعني نصيق بالماء و جافيل فين غادي ندبح و حبدا لو وسعت رقعة التنظيف أي بمترين على الأقل باش نتأكد من خلو المكان من البكتيريا لي سبق لية دكرت فمقال سابق…
2. نظف آلة الدبح بالماء البارد و نخليها تنشف و تكون حادة طبعا باش ماتكرفسش نتا و حتى الخروف
3. نوجد صطولة عامرين بالماء او تيو من روبيني
4. نجيب الأضحية لا جبتيها من مكان بعيد ولا طلعتيها فدروج ماترهقهاش و من الأحسن توقفها مكان دبح تستارح شوية باش ماتخويش مخزون الطاقة لي فالعضلات ديك لحظة باش يبقا طعم اللحم مزيان و مايكحالش بعد الدبح مباشرة
5. نتكي الخروف صوب القبلة و نسمي و ندبح. كاين لي كايدبح و يجرو جيهت لمجرا ديال الما.لا هداك خطأ..تما هو الريصطورو ديال البكتيريا و بالخصوص دم مازال جديد..خلي دبيحة بعيدة على لقرقارة و نصيق بلكراطة
6. مانفخش فدبيحة صعيب لحال لشخص لي كاينفخ و حتى دبيحة باش ماتلوتش حيت مزال لحم سخون و جديد و كايكون حساس لأي تلوث خارجي..كاين وسائل النفخ
7. ملي نبدا نسلخ نغسل جنوي و نغسل يدية بالماء و الصابون البلدي حيت معقم حيت فواحد الوقت غاتبدا تجر لبطانة بيديك ولا تخشي يديك باش تهبط لبطانة..
8. سلختي كملتي كاتحل لكرش تجبد دوارة ضروري يديك ديما نقايا مغسولين بالماء و صابون لبلدي غادي تجبد دوارة تغسل و تحطها فظل فوعاء نقي..
9. غادي توجد واحد طاصة فيها ماء  بارد ماشي سخون و كانأكد على هاد ماشي سخون حيت بحالا غاتحط ليصانص حدا لعافية دغيا يترباو البكتيريا..غادي دير فديك طاصة تلج كاع لا موجود و دير معاه الحامض من بعد تغسل صقيطة من لداخل و تخليها فظل تنشف..و تصيق تحت منها مزيان بجافيل و تحيد من حداها اي حاجة موسخة بحال لبطانة لكشرة الخ…
10. غادي ترجع تراقب دوارة مزيان لا فيها شي ديفو بحال قيح-حبوب-بقع سوداء الخ..تحيدهم و ديرهم بميكة و تسد و تلوحهم مايبقاوش يدورو حداك…
11. من بعد 6ساعات على أقل تقدير عاد نقدرو نقطعو من لحم لغرض الطهي علاش؟ حيت ملي كايتدبح الخروف كايتفرزو انزيمات des enzymes فالجسم هوما لي كايبدلو لون لحم و حتى المداق ديالو سبحان الله العظيم باش يولي صالح للأكل و كيما نقولو كايكون Chair و كايرجع Viande هادوك الانزيمات كايبقاو فصقيطة مدة قصيرة مور دبح ويلا كلينا من لحم تقدر تجينا لادياري و اعراض أخرى يطول شرحها
12. من بعض 8 ساعات أو على أكثر تقدير لغد صباح بكري قبل ماطلع ديك شمس لحارة نبدا نقطع لحم و ندير فلفريكو (ثلاجة) و من الاحسن ماندكسش لحم بحالا كانعمر فلوسايد حيت ماشي جميع الاطراف غايوصلها لبرد فالوقت ولا بنفس الجهد.
13. بالنسبة لراس مايبقاش فثلاجة اكثر من يومين حيت دغيا كايتحلل..نهار يوماين خصو يتكال..
14. بالنسبة لتقطيع ديال شوا نهار الأول…لي غادي يقطع فوق لوحة ديال الخشب ضروري يرشها بلملح عاد يقطع لكبدة ولا لقلب باش نقضيو على البكتيريا لي فوقها لا ترى بالعين المجردة
اخي المستهلك اختي المستهلكة الجو ليوم ماشي كيف زمان سنة مور سنة كاتبان بكتيريا جديدة و سرعة تكاثرها أسرع من تكاثر البشر و أي بلاصة ممكن تكون ملوثة واخا مانشوفوهاش بالعين المجردة غير الرواح راه فيروس و سخانة سببها بكتيريا الخ..لكن الحمد لله عندنا مناعة و لكن كاين شي بكتيريا جديدة ماعندهاش مناعة لكن عندها دوا و الدوا بالثمن…كنا كاننتظرو هاد حملات تحسيسية قبل لعيد لكن تلفازة فيها غا لا بغيتي كريدي ديال لخروف اما كيفاش دبحو داكشي ماكيهمش…الله يسخر للجميع و يجعلها فائدة و منفعة لكل الشعوب الإسلامية…

رياض وحتيتا :المحيط الفلاحي