رياض يكتب : شراء و تسمين الخروف لعيد الأضحى…

سلام الله عليكم خوتي خواتاتي الفلاحة رمضان على الابواب الله يدخلو عليكم بالصحة و الهنا و راحة البال..غالبا هادي هي الوقيتة فين كايدخل لكساب لخروف لعيد لي ولاد نعجات و لي غادي يلقط من سوق مول 30 الف 36 الف باش يخلي ليك شي بركة تبيع لدرويش حيت هو لي مكتسح الطبقة الوسطى بالمغرب و بطبيعة لحال تعزل لخروف لي مبيوع فالمنطقة لي نتا فيها يعني ماتقولش لية غادير صردي فمكناس ولا غادير تيمحضيت و تبيعها فكازا حتى تثمين المنتوج و اختيار السلالة الملائمة لبلاصة لي مطلوبة فيها عندو دور أساسي…لفلاحة را حرفة و ماركوتينغ…خرجتي لسوق ولا مشيتي لفيرمات…شرية لمزاينة هي لفيرما تمشي وقتما بغيتي و عندك الاختيار سول غير على لفحل تعرف السلعة كيطالعة…اما شرية ديال السوق فيها لهوتة ولكن نتا و حرفتك فتعازيل…سؤال المطروح لحد الآن هو كيفاش تشري لحولي..واخا…دخلتي لسوق ماعمرك تزرب واخا يعطيوه ليك فابور…ديك (تقليبة المزروبة ديال ظهر و موراها شحال هاد لخير) مابقاتش واكلة أعشيري فسوق حيت لكساب لبياع غايعرفك مازال غاكادور و كاتجيب خبار السوق وتقدر ماتشري تالعبة ولا غايقول مع راسو راه تابعك صاحبك يرقد موراك سوق و حتى لا كان مزير كاع واقف على لبيع مايجيكش من لخر لمشرا ديال لخروف ماشي بحال لعجل…دخل لسوق شوف غير بعينيك حيت قليل لي غاتلقاه شاد حبة ولا جوج و أغلبية مول حبة ولا جوج كايقلب على لجزار…ملي ضرب شوفة بعينيك غادي تعرف سلعة لي بغيتي يعني صغيرة كبيرة متوسطة علاش؟؟..حيت أغلبية كاين لي شاد سلعة تقادة وحدة باش يجيك من لخر يقوليك ضرب معايا فكلشي بتمن واحد لراس…عبرتي سوق نيشتي على سلعة لي بغيتي دخل فيها طول و عرض..كيفاش؟
-يديك فوق ظهرو..(ماشي ظهر لكساب هه) ظهر لبهيمة لكساب مادويش معاه حتى تسالي..ديها و جيبها فوق ظهرو تحسس بصباعك ضلوع واش باينين ولالا..
-قلب لفولات و ديالة واش مشحمة 
-قلب سنان من احسن يكون سنان لحليب صغار و بيضين..ممكن تلقاهم كاملين كحلين غايقوليك را لخروف كايهرس فسنان..هاداك غا لميلاص أحبيبي…
-دير يديك تحت لخروف و خلخل ليه كرشو بحالا غادي ضرب ليه كرشو غي بشوية وبزربة بحال كاتقلب دلاعة لاحسيتي بتقلقيل ديال لما راه كاتبان عرفو مولاه مشبعو ماء و مدخلو لسوق غاتوصلو لكوري غايتفش ليك…
-ضرب ليه لبيل فعينيه مع ظلمة فسوق ماتبانش ليك جلالة فعينيه…
-زغبة تكون صافية و نقية مامشنتفاش (نقص فالكالسيوم) من هنا تعرفو ماعمرو سرح ولا شاف شمس غير لكوري… بالنسبة لي غايتقدا صردي و صدر عريان را كاين صردي لمبرهش فيه لوشام فنيف و لعينين لكن كلو بطانة
-ضرب ليه لبيل وسط ودنيه و ورا ودنيه لا فيه شي تونية غاتبان و ضرب ليه لبيل فلفراقش يكون مكتاملين ماموكولينش الفورما ديالهم طبيعية 
مايزربش عليك لبياع يقوليك ضرب معايا فكلشي را لي فراس جمل فراس جمال ضروري حبة ولا جوج ناقصين..برك معاه الارض فثمن ملي تفاهمو شد ليه شي 100درهم قوليه بحالا جينا عندك و عشيتينا ولا تعاون معانا على طرونصبور ههههه و ماتخلصوش فلبلاصة واخا تكون هاز فلوس عربنو وقوليه خرج معايا لبرة علاش؟.. ملي غادي تخرجو سير ورا لبهيمة باش تعرف لي غادي مقاد ولي غادي كايعرج حيت مايمكنش ليك دير بيهم عرض الازياء وسط سوق كل بهيمة تمشا معاها بوحدها اوا فهم المعنى باش لي لقيتيها غادا عوجة تنقصها من لحساب حيت فلوسك مازال فجيبك اما لاتبايعتو ضربك طرامواي أولد عمي…و خود نمرتو ضروري حيت واحد الوقت ماغاتبقاش تلقط من سوق غاتربحو من بعد 50درهم فراس و جي لعندو لكوري تعزل قبل مايدخل لسوق وتعاود معاه هاد صطاجات كاملين…وبلا مانوصيك ضروري دخل ليه شوية ضحك و تقشاب فلهضرة ماتكونش روفيكص باش تقدر دخلو عندك لتيران وتفاوض معاه كيف بغيتي…
الله يسخر دخلتي لبهيمة عندك الكوري غاتعطيهم الرايب و نهار ديال لما وتبن فقط باش يلوح لاعندو شي ميكروب و يدير رايب المفعول ديال…نهار ثاني غاتلقحو بدوا ضد Anterotoxemie ديال مرارة anterovet حيت غاتبدل عليه لمرقد و لماكلة…نهار تالث غادير ليه إيفوميك D شوكة 2cc لواحد ضد الطفيليات الداخلية والخارجية باش لي دفعتيها ليه تبان عليه و تبدا معاه لعلف شوية بشوية لاقدرتي طحن ليه تبن مزيان تخلطو ليه مع علف طاقي بحال نخالة من بعد دخل ليه لفصة و تبن صباح و بدا تحرش ليه لعلف دفع ليه فالاول 100غرام علف فلعشية و حاول تولفو على وقت محدد فاليوم للعلف ماشي وقتما ساليتي…من بعد بدا تزيدو 50غرام فنهار حتى توصل لكمية العلف المطلوبة و لي هي 2.5% من الوزن ديالو نتا لاماعندكش لميزان ديال لبهايم بدا تزيدهم حتى لنهار يشيطو هادي طريقة تقليدية المعروفة و دير ليهم حجرة ديال لملحة لحية وسط لمجاور باش يلحسوها و تعطشهم مزيان…لحال سخون دابا خليه يبات مهوي و يكون لكوري مافيهش لكورونضير منقي مجير و كتر ليهم لعلافات لا كان فالاستطاعة.. و لا دير بلان مزيان دوك مالين لقرون مجبدين طوال عزلهم بوحدهم…غاتجيك غريبة نقوليك علاش…حيت ملي كاتحط لماكلة ديما مول لقرون صغار كايدير بلاصتو وسط القطيع و كاياكل مزيان و مول لقرون طوال كايبقا يدور عليهم من هنا لهنا كايقلب فين يخشي راسو و غالبا ماكيدير بلاصتو حتى كايضربو نص فلعلف كايتسنا غي شي واحد يغفل يخرج  يشم لهوا كايشقمو و يخشي راسو بلاصتو هههه…
الله يسر ليكم خليتكم على خير اخواني اخواتي الكرام…

المحيط الفلاحي : رياض وحتيتا